Boxeoa, Saskibaloia, Kirol Egokitua, Txirrindularitza eta Arraun federazioek, ASFEDEBIrekin batera, Berdintasun Plana garatu dute, kirolean berdintasuna sustatzeko helburuarekin. Bizkaiko Foru Aldundiak kirol arloan berdintasunarekin duen konpromisoa berretsi du gaur arratsaldean Kirol Etxean egindako ekitaldian.
Urriaren 23ko arratsaldean Kirol Etexan Bizkaiko kirol federazioekin eta ASFEDEBIrekin batera egindako ekitaldian, Bizkaiko Foru Aldundiak lurraldeko bost kirol federazioren berdintasun planak aitortu ditu: boxeoa, saskibaloia, kirol egokitua, txirrindularitza eta arrauna, eta ASFEDEBI. Leixuri Arrizabalaga Euskara, Kultura eta Kirol diputatuak kirolean genero-berdintasunak duen garrantzia eta Bizkaiak kausa horrekiko duen etengabeko konpromisoa azpimarratu ditu.
Bost federazio horiek beren berdintasun-plana garatu dute ASFEDEBIrekin batera, eta, hala, konpromisoa hartu dute gainerako federazioekin, bi urteko epean Bizkaiko federazio guztiek Berdintasun Plana izan dezaten laguntzeko. Era berean, denbora horretan, federazioen egunerokoan berdintasun-planak ezartzeko prozesuaren jarraipen-programa bat garatuko da, horiek kirolaren zerbitzurako benetako tresnak izan daitezen.
Arrizabalaga diputatuak eskerrak eman ditu ahalegin horiengatik, eta nabarmendu du bere konpromisoak, kirol errendimendua ez ezik, giro inklusiboa sortzea ere bilatzen duela, pertsona guztiak, beren generoa kontuan hartu gabe, ongi etorriak eta errespetatuak senti daitezen, nabarmendu du.
Arrizabalagak azken urteetan Bizkaian kirolean genero-berdintasunaren sustapenean egindako aurrerapen esanguratsuak aitortu ditu, eta emakumeak eta gizonak baldintza berdinetan lehiatzearen garrantzia eta kirolak zeregin horretan betetzen duen funtsezko papera azpimarratu ditu.
Era berean, diputatuak Bizkaiko kirol sarea osatzen duten erakunde guztiak animatu ditu berdintasun planak aurkeztu dituzten federazioen eredua jarraitzera, eta nabarmendu du kirolean berdintasuna lortzea elkarrekin lan eginez lor daitekeen helburua dela.
Ekimen hau Bizkaiko Foru Aldundiko kirol taldeak EMAKI Foroan (Emakumea eta Kirola) definitu ziren ondorioak aztertu ondoren abiatu da. Foro horretan Bizkaiko emakume kirolariek parte hartu zuten, eta Bizkaiko kirol federatuan benetako berdintasuna lortzeko garatu behar diren jarduera ildo nagusiak ezarri zituzten.
Bizkaiko Foru Aldundiak lanean jarraituko du emakumeek kirol-diziplina guztietan parte har dezaten sustatzeko, aukera-berdintasuna bermatzeko eta kirolean errespetuaren kultura sustatzeko.
